Қарор қилдингизми?
Бошланг.
Қарор билан амал орасида энг хавфли масофа бор.
Ғоялар айнан шу масофада ўлади.
Мен ўзим узоқ хаёл суриб ўтирмайман. Фикр келдими, қарор қилдимми, шу заҳоти амалга киришаман.
Чунки бир нарсани тушуниб етганман: қарорингиз тўғрими ёки нотўғрими, синаб кўрмагунча билолмайсиз.
Ўзимни бекор турганимда ушлаб олсам, кечирмайман. Дарҳол бошлайман.
20 йилдан ортиқ касбий тажрибамда бир марта ҳам уриниб кўрганимдан пушаймон бўлмаганман.
Баъзан натижа кутганимдек чиқмаган. Лекин яхши натижаларнинг ҳаммаси ўйлаб ўтиришдан эмас, ҳаракатдан келган.
Яратганнинг ўзи инсонга саъй-ҳаракатига яраша беришни ваъда қилган.
Ният — бошланиш. Натижани эса амал беради.
Оёғингиз енгил бўлсин
Оғир одам «шароит тайёр бўлсин» деб кутади. Оёғи енгил одам шароитни йўл-йўлакай яратади.
Бу шошқалоқлик дегани эмас. Ўйлаш ҳам, хавфни ҳисоблаш ҳам керак.
Лекин ўйлаш бошқа, хаёл суриш бошқа. Ўйлаш қарорга олиб келади. Хаёл эса яна хаёлга. Хом хаёлга…
Бир йўл ишламаса, тўхтаманг, йўлни алмаштиринг.
Мақсад ўзгармайди. Усул ўзгаради. Ҳаракат тўхтамайди.
Бугун уч қадам:
1. «Кейин»ларингизни ушланг. Кейинга сурган фикрларингиз борми? Уларни бирма-бир ёзиб чиқинг. Қайси бирини ҳозироқ ёки 1–2 кун ичида амалга ошира оласиз?
2. 48 соат қоидаси. Қарор қилдингизми, 48 соат ичида биринчи амални қилинг. Қилмадингизми, демак, бу қарор эмас, орзу экан.
3. Кечки тафтиш. Ухлашдан олдин ўзингиздан сўранг: «Бугун нимани ўйладим-у, қилмадим?» Жавоб эртанги биринчи ишингиз бўлсин.
Ғолиблар энг кўп ўйлаганлар эмас.
Улар биринчи бўлиб бошлаганлар.
Сизнинг «кейин» рўйхатингиз қанчалик узун?
P/s: Бу постни «кейин» деб юрган дўстингизга юборинг. Балки унга айнан шу туртки керак.